I miei Video clips furlans

Loading...

20 dic 2007

Il barbon (2)


Oramai il barbon al si sintive come un cjan.
Come un cjan aflit e cul morâl a fetis a nol saveve stâ zence fâ une smorfie pal frêt o pa fan, pe indifarence di chel ch'a no i dave nuie o di chê ch'a i dave dome un toc di pan pal cjan.
Ma lui, no erial un cjan abandonât ancje lui?
No vivevial oramai che cun lis surîs e lis pantianis ch'al rivave a cjapâ su chel marcepît di chê strade pedonâl? Al si ere indacuart che lis sôs smorfiis a vevin fat ridi cualchi bocje maleducât e pôc a pôc, al veve cjapât coragjo e viodint trop che lis sôs smorfiis a tiravin l'atenzion, al si ere mitût a fant ancjemó di plui.
Lui al ere un artist e s'al ere deventât cjan, al veve di sei un barbon blanc di razze superiôr. Seben ch'al ere in cheste situazion justamenti parcé che in te vite a nol si ere mai pleât a lecâ nuie a di nissun a no i impuartave plui s'al veve di lecâ lis scarpis o i stivâi ai passants..
Strenzût tal so costum di barbon blanc fat di fâlse pelice cjatade in tun vêr marcjât, al si poiave su lis gjambis di daûr e al tacave a menâ le code mobil sfracheant une a une lis balis ch'al si ere fat cun doi pêrs di gome par clisteris ch'al veve cjatât tal cassonet dongje di une farmacie.
- Uouuuuuuhhhh. Al sburlave disperât.
E il so cjan cul spirit di scuâdre al rispuindeve cun tun rivoc: - Uouuuuuuuuhhh
Le int a si fermave cui vôi storpeôs ma pronte a ridi e infat dopo il secont o il tierç zîr di code a si metevin a ridi ancjemó plui che i canais...
A dome 5 dîs da Nedâl, varessial cjatât finalmenti une maniêre par sbarcjâ il lunari?
A si lu savarà dome doman.

Nessun commento: