I miei Video clips furlans

Loading...

24 dic 2007

La fin dal barbon

" - Ma và a lavorâ! Al veve cridât cualchidun
-Mangja pane a ufo! Al veve zontât cualchidun âltri par talian ma cul acent furlan!
Cemût podevial riscomençâ a fâ il so numar di paiasso cun int cussí? A no i vignive plui le voe. Il so assistent che forsit al si noiave al ere lât a sentâsi dongje dal cjan dal vuarp e cuant ch'al veve sintût lis campanelis dal barbon al si ere mitût a fâ il zîr dal cercli come ch'al veve cjapât le abitudin di fâ. Dome che chiste vôlte il cercli al ere il cercli dal vuarp e no il so...
Il barbon, al veve cjapât sù i bêz e iu veve puartâts al vuarp ch'a lu veve ringraziât e a i veve domandât di restâ cun lui. Forsit par voe o forsit par obligazion, il vuarp e il barbon e i lôr doi cjans a si erin mitûts a lavorâ insiemit. Enfre i ululaments dal barbon e dai cjans il vuarp al veve tirât jù cualchi acuardi cun le ghitare e al intonave une cjançon lancurôse cun lis peraulis ch'a someavin cussí:
Ce tante int ch'a 'n dé ator di me
Int ch'a s'in va e po int ch'a s'in ven
Zence cjalâ ator di se
Zence fâ mâl ma zence fa ben
Viergimi i vôi
O ai voe di viodi
So sin besôi achi a basilâ
Nissun paron al nus coparès
Di masse fâ o di masse lavôr
Ma o savin ch'al é simpri lostès
E che 'l cjargnel al si cope besôl
Viergimi i vôi
O ai voe di crodi
Ch'a 'n dé un troi ch'o vin di cjapâ
No, no sta vaî
No sta blestemâ
No, no sta vaî
No sta...No sta... Nol sta ben
A nol sta ben.
Viergimi i voi.

Ma enfre i dincj ,il barbon al someave blestemâ distès e soflantsi il nâs enfre i vôi rós e bagnâts di lâgrimis al si disève che mai plui al varès fat il vuarp. Al veve stât vuarp avonde par no viodi indulà ch'a ere le sô strade. Le cjançon a cjacarave di un cjargnel e lui al ere un cjargnel. A no lu veve mai dite a di nissun. Forsit al si vergognave ancje di dîlu. Ma s'al ere rivât adore a fâ bêz fasint il cjan no podevial cun le stesse energjie finî di fâ cheste vite par tirâsi fûr di aí?
Il vuarp, a lu veve capît zence viodi e lui ch'al viodeve a nol veve capît nuie.
Dopo l'ultim ululât dal cjan, il vuarp ai disève: -Viergimi i vôi.
Ma i al diseve in tun ton cussí dramatic e strident ch'al scuignive capî che ce ch'al voleve dî al ere: Vierç i vôi...I toi vôi!
Torator, le int a ere tant comosse che le scudjele, zà emplade di bêz a no bastave, e alore a vignive a dai i bês a lui come s'al fos par consolâlu. Ma plui a in davin e plui al vaive.
- Vonde. -Vonde! Al cirive di dî...Ma lôr a someavin fâ come s'a volessin dâi une punizion par vê vulût ridi di lôr.
Le vee di Nedâl fint a l'ûltin minût, le int a no si fermave di pasâ e ripasâ e il barbon a nol in podeve plui. Il vuarp a i veve dite ch'a vevin di dividi i bêz in doi e che oramai e fasevin une buine squâdre insiemit. Il barbon al veve dite di sí cjalant in tes sachetis trós bês ch'al veve. Tant ch'al contave, al veve cjatât ancje un biliet da visite e lu veve mitût da bande.
Enfre i soi pinsîrs, al lave indenant cjaminant ben cul so cjagnut ae çampe e il vuarp ae diestre. Cun duç i biliets di 5 e 10 euros ch'al veve al varès podût vivi par doi mês e plui zence lavorâ ma al s'impensave di chel siór ch'a i veve lassât il biliet da visite. Al veve vidût le sô ûltime representazion e ancje lui a i veve lassât cualchi franc. Daspo al ere lât vie e al ere tornât il dí dopo dut content di vêlu ricjatât scuâsi tal stès puest e a i veve dite ch'a i plasève un grum ce ch'al faseve e ch'al varès stât content s'al varès vulût lâ a fâ il stès numar tal so circo ch'al lu varès puartât ator pal mont amancul par dîs agns.
Il so Circo al ére il plui grant circo d'Europe . Lui nol olsave crodi ma al ere scrit sù le cjarte da visite. Alore, ce fâ di chei bêz ch'al veve in te man? Al veve decidût di lassâ dut al vuarp. A ju meretave. E po, lui cumó a nol in veve plui bisugne. Al veve cjatât un lavôr. Al varès mitût i bês in te sô sachete e al sarès sparît prime che il vuarp al vedi il timp di reagjii. Eco, propit cussí: Cumó al si sarès voltât, a i varès mitût i bêz in te sachete a lu varès saludât e op, vie. Sparît par simpri. A nol voleve ringraziaments. Al voleve iuste fâ cê ch'al veve voe di fâ e vonde.
Ma cuant ch'al si é voltât il vuarp al ere sparît.

1 commento:

adrenalid ha detto...

Bon Nadal Jaio!!!
Che a ti parti une vore di contentece, salut e amor.
Mandi mandi
Giulia