I miei Video clips furlans

Loading...

17 dic 2007

L'amâr 'n te bocje

Cicio al ére cun mé da cuant che me mâri a ere lade tal ospedâl e da cuant che le mê femine a mi veve lassât di besôl o mi sintivi cualchidun cun lui.
Ch’al sedi un fradi o un parint, par stâ ben cun cualchidun, so no vin nùe in comun, al devente simpri plui pesant da vivi insiemit ma jó e lui a si ere de stesse rasse, o erin deventâts amîs ancje se di mé a nol si fidave masse.
Vie par misdi, cul telefonin ‘n te vorêle, mil pinsîrs tal cjâf e plen di rôbis da fâ o eri sparît vie dismenteant sul fuc une padiele e un pignatin cun le mê marinde che si scjaldave.
Mi soi indacuart dome cuant che il fum e l’odôr di bruzât mi son rivâts jù al plan di sot. Cuant ch’o soi rivât sù, il Cicio al ére come sentât par tiare e al tirave il flât come s’al fós intoseât. O ai viarzût subite lis puartis e i balcons par fâ curint d’àiar e o ai butât fûr pal balcon le padiele e le pignate oramai rosse e plene di cjarvon d’asparagos e...
Nùje, o rivavi masse tart.
Il Cicio al si ponève jù su le so diestre cui vôi scierâts cirint di cjatâ il respîr. O ai ben cirût di fâi il bocje a bocje ma nuje di fâ, il Ciccio al si ère scindilât. E miarde ! Miarde ! A nol si movève plui.
Ce rasse di mone. O lu vevi copât ! .
Prime ch’o viergi le puarte lui al mi sintive vignî sù pes scjalis e al tacave a fâmi fieste cui soi cinguets come un cjan cun le so code.
Oh, nol ére un cjanterin, lui al savève dome pivetâ.
Puet, puet o i disèvi. E lui al mi vignive a mangjâ in te man..
Puet puet o i disevi vierzint il rubinet e lui al vignive a bevi...
Cun lis frutis che vaívin tornant de scuèle, o ai scuignût recuperâlu te scovacêre e organizâ il funerâl enfre le cusine e il grant vâs dal ibisco de terace. Nùje di speciâl. Un rôbe sempliç zence fasts. Al polsarà cujét in tune scjatulute di camembert a forme di mieze lune ch’o ai cjatât tal frigo dulà ch’a son i formadis.
L’ibisco ogni dí al fâs un flôr tant ch’al si passís il flôr dal dí prime. Cicio al starà ben li sot.
Vuê al varès vût di plovi ma invesit aé une zornade sfaçade e plene di sorêli.

A misdi, di besôl cui miei pinsîrs o soi lì devant il vâs a cirî di capî ce ch’al é sucedût.
Il flôr dal dí al é zà mieç vierzût.
.-Puét, puét...Il camembert al mi somee amâr e sa nol é lât di mâl e o scuen butâlu vie.

1 commento:

ILfurlanist ha detto...

Tu sês invidât ae http://ilfurlanist.splinder.com/post/15169890 Eletrocjadenefurlane di Nadâl