I miei Video clips furlans

Loading...

04 dic 2007

Nóns e sôrenóns


Jó , o sarès il fi da Nina da Cuca. Bateât il Nonçul dai vissins parcé ch'o zujavi simpri a fâ messis e processions e ribateât il Jaio par gno fradi cualchi mês dopo ch'al ere nassût e oramai deventât il Furlanâr di cuant ch'o pirueti achi ator.
E vuâltris? Vêso ancje vuâltris un sorenon o vêso dome un nick?
Chiste manie di ribateâ le int nus ven dal passât. Come ch'o vin cualchi von celtic, in Friûl o vin nons di paîs ch'a finissin par Ac come Cussignac, Caporiac, Cognac...Ups, o confont cun le France indulà che ancje là une buine part e a subît lis stessis influencis.
Daspó, cui romans e duç i barbars, o vin fat dut un miscliçot e finalmentri, da nô come tal rest da l'Europe o vin tacât a dâ i nons dal puest.
Dal bosc, Del Bosco, Du bois, Wood, Van den Bos a son dome cualchi esempli.
Tal rinasciment cualchidun al veve bielzà il nón di so pâri ma secont ce che an fat, a son deventâts famôs cun âltris nons come Leonardo da Vinci, Giovanni da Udine, Il Perugino, ecc. Al sarès interessant di fâ une recension di duç i sorenóns ch'a esistin ancjemó in Furlanie e soredut in Cjargnie indulà che lis tradizions a restin simpri un pôc di plui.
Lis sonoritâts di chesç sorenons a son un grum plui interessantis che i volgârs nicks ch'a vegnin fûr da ogni pagjine web. Nol é ch'o tegni asolutamenti a dut ce ch'al é vecjo e tradizionâl ma pluitost a dut ce ch'al é origjinâl e par esempli al nol mi splasarès sa si cjapas le abitudin di fâ come i nestris lontans cusins gallês che ancje a cost di deventâ incapîts e rivin ancjemó adore a vê nóns impussibils come chest:
llanfairpwllgwyngyllgogerychwyrndrobwllllantysiliogogogoch.
Daspó, o lu darès da pronunciâ a un canai apene nassût che, a si sà, al tint a semplificâ cussí ben i nons ch'a tu i dâs ch'e par finî a nol é lui ch'al dîs come te ma tu come lui tant al é vêr che lis peraulis a deventin internazionâls come pipi, caca, papa, mama e vie vie. A chest pont, o mi domandi parcé ch'o vin di fâ plasê a un prêdi par bateâ cualchidun al batêsim cuant che dopo, al baste un bocje, par ribateânus par dute le vite.

2 commenti:

adrenalid ha detto...

eila,
ce biel blog, simpri plen di informasions e avventures.
ti ringrasi par il biel coment che tu mi as lasciat tal post, grasie pardabon.
stami ben!
mandi mandi
giulia

Jaio ha detto...

No sai s'ae la mê sfurtune ma o plâs dome as feminis:-)