I miei Video clips furlans

Loading...

07 dic 2007

O sin simpri aí !

In Friûl al si varès di vê dome un partît. Il nestri. Chel di ducj. Al massim trê cun le Cjargne ch'a tire in sù e Triest ch'al tire in jù.Ma trós in vino?
Se l'union a fâs le fuarce, le fuarce a no a l'aiar di poiâsi da nô.
Par furtune, le fuarce papâl a no é plui chê di prime cuant che par fâ un bal al bisugnave domandâ le permission al plevan. Ma se lis glêsiis a si svueidin, chei che restin a son simpri avonde potents par rindi impotents chei ch'a volaressin ignorâiu o disglonfâur lis gomis.
Insome o sin simpri aí. Se 'l Pasolin al fos achi, invesit di esi considerât il plui âlt inteletuâl furlan al sarès mandât in mone come il plui grant dai rompibalis e so fradi copât al si fasarès ricopâ.
O sin simpri aí.
Baste sintî ce tancj politicants ch'a saltin fûr ogni che âltre dí.
Ducj come duces in miniature ch'a fasin spetacul par contradîsi un cu l'âltri a proposit di rôbis ch'a non an nuje di viodi cul Friûl, tant al é vêr che cuant ch'a varessin di tignî pal Friûl, a si metin cuintri. Il passât da l'Italie nus mostre che il paîs al é simpri stât frazionât in piçui bacons di tiare ch'a si fasevin vuere.
Po ben o sin simpri aí.
Se po, ogni bacon di tiare al é sparniçât in bacons di partîts ce ch'al nus reste al é juste un grum di fruçons.
Intant che in Italie a si faseve il rinasciment, dissal Orson Welles, in Suizare e fasevin arlois a cucu.
E in Friûl ce vino fat?
Al si puedarès dî che plui o sin difarents e plui o vin le pusibilitât di fâsi concurince. Forsit tal rinasciment al é stât cussí enfre i ducâts, e i archiducâts di là di Vignêsie ma da nô, invesit di fâ cresci le concurince e le voe di vinci o vin fat cresci le apatie e le pôre di movisi. Pôre di tignî par une cause ch'o crodin simpri pierdude.
Dome une rôbe al puedarès unînus: Un campionât di calcio indulà che l'udinês al sarès vincidôr...Ma come che chest a nol rive nancje a ogni muart di pape, a nol é doman ch'al sucedarà.
Camarîr, se chest al é un café, puartimi un té, se chest al é un te puartimi un café.
Par me ancje L'Illy al é un café furlan ma parcé il camarîr mi puartial un té in tune cjicare di café? O sin simpri aí.

8 commenti:

Furlans de diaspore ha detto...

les pocjs voltis co seguis le politiche furlane mi ven inzirli . E je plui complicade, machiaveliane di che merecane a livel federal.

A livel nazional, al e' simpri al stes spetacul cui stes ators e le stesse trame.

Jaio ha detto...

...E sicome a son simpri i stès furlans e i stès talians, no in d'é sperancis:-)

ILfurlanist ha detto...

Apene det che i vularès un partît unic, zà tu separis la Cjargne dal Friûl... Insome: cuissà cemût mai nol è chest partît, eh?

Jaio ha detto...

No é colpe mê se lis rôbis a son cussí. No soi jó ch'o ai organizât un referendum pe autonomie de Cjargne tal 2004. No soi jo ch'o sburti i triestins a tirâ de lôr bande. In tant che cjargniel di nascite e furlan di adozion a mi plasin ancje i triestins ma lis rôbis a son cussí.Ognun al tire de sô bande secont i lôr interès o secont il partît (Talian) indulà ch'al si cjate.

ILfurlanist ha detto...

Organizâ un referendum pe autonomie de Cjargne no ûl dî che la Cjargne no fâs part dal Friûl. Alore nancje Gurizze e PN no son in Patrie. Ma tancj a volaressin fâ intindi cussì

Jaio ha detto...

Scûse Dree ma no ai voe di lâ fûr di strade. Par me, s'al fos un partît dut pal Friûl al sarès l'ideâl. Un partît indulà che le cause principâl ch'a si difint o a si definís in comun aé la stesse par ducj, chest al é il plui impuartant. Ma a no si puès fâ demagogjie.
- Dutcâs, chel ch'o sotintendevi al ere di fâ un partît o al masim 3 par contraponi a l'Italie che a 39 partîts politics. Plui che dute le europe mitude insiemit. Une cretinerie basade su le democrazie. Infat, plui democratic di cussí a nol si puès. Dome che par fâ alc al bisugne domandâ 38 permissions o fâ 38 concessions.
Se ogni partît talian al a une delegazion in Friûl, prime di lâ indenant cun tune decision nus tocje passâ 38 vôltis par dute l'italie. Ce saresino alore 3 partîts furlano-gjulians sa nol si puès fant dome un? Chiste aé l'idee e no crôt ch'a tu sêtis contrari.

ILfurlanist ha detto...

Plui che contrari mi ven nome di ridi: tu protestis parceche in Italie a son 39 partîts e dopo tu proponis 3 gnûfs partîts in Friûl. Che se ogni regjion e fâs cussì a 'nd varessin 60 gnûfs! Ah Ah AH. Ma parcè croditu che e sedin cussì tancj partîts in Italie?
Parce che ducj e rasonin come te: al è un problema? Fasìn un partît! No si metin d'acuardi su chel problema? Vie altris trê.

E si torne al gno riliêf iniziâl: «Apene det che i vularès un partît unic, zà tu separis la Cjargne dal Friûl.» Tu âs volût evitâ la me contestazion però tu âs fat il tacon pies de buse!
(e il partît furlano-gjulian tegnital tu)

Jaio ha detto...

Eh no, sa tu scancelis i 39 partîts talians in Friûl par fant dome un o al massim trê furlans a nol é compagn. Tu a tu consideris che 'l Friûl al a di vê i stès 39 partîts che il rest da l'Italie ma no jó. Par fuarce che alore tu tu fâs addizions tant che jo o fâs le mê sotrazion. No sai ce ch'al cji sburte a crodi rôbis ch'o no dîs. ma se chest al cji fâs ridi, torne di spès, ch'a tu ridarâs di plui:-)