I miei Video clips furlans

Loading...

04 gen 2008

I pâris, i cusins e lis sûrs de polente

Indulà ch'o soi nassût jó, in tal sud dai USA a si usave di dî che i fruts a son come il grits, e varessin di sei tirâts fûr trê vôltis in dí a l'ore di mangjâ e daspó tornâts a meti vie.
In cualchi regjon da l'Italie, e soredut in Friûl, i abitants a somein di vê lis stessis abitudins cun le polente, une cusine di chel grits ch'o soi stât tirât sù.
Il grits e le polente no son veramenti le stesse rôbe. In Friûl le farine a é fate cul sorc e invesit da nô il grits al é fat cun le vene.
Il merecan ch'al cjacarave cussí al veve fat un sito ch'o no sai plui cjatâ dopo cualchi mês ma cuant ch'o cîr di fâ il tradutôr no stait a vê pôre, o no fâs il traditôr.
Pes fiestis o eri invidât in tune societât di armenians indulà ch'a in d'ere un grum di altris nazionalitâts e o ai scuviert che le nestre polente, sa é une cusine di chê amerecane a é une soûr di chê de Moldavie ch'a si clame mamaliga. (pronunciait la i impure enfre la U e la E:-)
Ancje lôr a fasin le polente cun le farine di blave dome ch'a le fasin plui mole come ch'al sucêt chi e là in altris regjons d'Italie e come achi in Val dal ostie ancje lôr ch'a le an fate grande prime di nô...
Sperin che le Moldavie no rivi ancje jê in Europe e ch'a rivendichi le paternitât de polente che dopo il Tocai e le polente al no nus restarès plui che il frico.
Il Frico? Po ben, me cusine de Svizare, jê a sà ch'a mi, a mi plâs il frico, e ogni vôlte ch'a ven a cjatâmi a mi puarte une buste di Rüsti svizar ch'al é ancje chel une fartae fate di formadi, persut e patatis taçâts fins fins e brustulîts in padiele e che par mé, puar biât bandonât in tun paîs di puré e tartinis, a mi somee frico.
E se i Svizars e si decidin a vignî in Europe?
A si starès frescs. Ma par furtune, a son convints di sei miôr che nô ducj e no an nissune voe di stâ mancul ben di ce ch'a crodin di stâ. A crodin ?
No, no, une societât inglêse e a fat un studi sù lis sitâts indulà che i abitants a si cjatin miôr e ben, le prime sitât tal mont, a é Zurigo. Us dîs subite, che in te classifiche a no in d'é nissune vile taliane ma par no faus pene, a no us dîs cualis ch'a son chês dopo di Zurigo.

Nessun commento: