I miei Video clips furlans

Loading...

7 gen 2008

Il prin amôr a no si dismentee mai


Sul calendari, i dîs a erin scrits in grant cun ducj i nons dai sants e se le maestre a dismenteave di fâlu, o lavi a tirâ vie il sfueùt dal dí prime par viodi le foto ch'a in d'ere.
I dîs e passavin lents e noiôs ma no avonde parcé che lis setemanis, i mês e i agns a son passâts cussí svuelts ch'al mi somee íar. Jê e jó o sin simpri restâts amîs. E faseve part dai miei insiumps ancje so eri inamorât de maestre. A mi consolave cuant ch'o vevi une brute pagjele, a mi dave sperance cuant ch'o vevi un esam , mi ispirave cuant ch'o vevi voe di meraveâ le maestre cun tun disegn o cun tun penso e a mi perdonave cuant che plen di noie o scjampavi cun lis mans in tes bûsis des mês sachetis...A mi judave a passâ il timp.
.Sôre de puarte de entrade de scuele Ippolito Nievo, come tal latin dal medio evo, a vevin scrit la U di scuola come une V e jo o i disevi simpri a ducj:
- Cjale, e an scrit scvola. Ce mones!
Jê a no mi rispuindeve, dutcâs o no m'impensi e forsit par chel i prins scaraboçs iu ai fats cun jê. A someave simpri cussí calme e serene ch'o le vevi tolete come model privât e le disegnavi e le pituravi in dutis lis maniêris: cun tun cjapiel, zence cjapiel, cun tun vêl, zence vêl, sentade, impíns, ponete, prime simpri vistide e dopo simpri nude. Cul passâ dal timp, ognun al ere lât pe sô strade ma o vevi savût che da l'Italie a ere lade a finî in France cun so pâri e par vie di un esamp o vevi decidût di lâ a viodile a Parigji. O vevin apontament al Louvre as dîs di buinore.
- Ce emozion di viodile lí in cjar e in vuès devant di me, o pensavi.
Come Goethe entrat a Rome al veve dite che Rome a varès stade sô, jó o mi disevi che finalmenti jê a sarès stade mê.
A someave ch'a fos contente di viodimi ma cualchi moment a mi faseve dubitâ. Le sô dolceze ch'a veve in tai vôi cualchi vôlte a mi someave ironiche.
- Cuissà, forsit a ere sposade e no voleve ch'o lu savès? O mi disevi.
Lâ al Louvre a nol coste plui che lâ al cine e po lí cun jê o eri contentissim.
Al ere come un viaç in aereo indulà che lis nûls a erin cussí bielis e cîl cussí blù che jó o paiarès il biliet ancje zence fâ il viaç. Baste sei dentri l'aereo cualchi minût. Al Louvre, dut al é deventât plui clâr. Finît di fantasmâ, finîts i dubits. No sai s'a ere la fin di un insiump o la fin d'une ossesion ma cumò le sô musute a la Kidman le varès mitude volentîr in tun cuâdri a la Vermêr.
Par un esamp, a le academie, o eri zà vignût cualchi dí prime par fâ lis cjartis par entrâ al Louvre come copist. Baste vê une racomandazion da un copist zà iscrit, un certificât de tô scuele, une atestazion de tô ambasciade e cuant che il conservatôr al cji dà il so OK a tu cji presentis cui colôrs e i pinei e une tele che a di sei 5cm plui piçule o minimo 5cm plui grande che l'origjinâl senó a no cji lassin entrâ. Se invesit a tu âs capît ch'al nol bisugne fâ scherzos, a tu sês iscrit par dute le tô vite e tratât cun rispiet. Un guardian al ven cun te, al cji puarte un cavalet e un tapêt par meti par tiare e tu puès lavorâ in pâs.
Prime de vuere, al mi diseve un vecjo copist dongje di me, lis buinis copiis a erin paiadis secont il numar di biliets da mil ch'a tu podevis meti parsôre un tacât di chel âltri ma a si ere une cincuantine di copiscj a entrâ ogni di...
Cumó, o eri li di besôl come lui. Cuissà tropis copiis ch'al veve zà piturât...No savevi chê dai 5cm e no savevi nancje ch'al bisugnave entrâ cun tune tele blancje e le mê copie o le vevi zà ben scomençade a cjase. Par furtune che il guardian ch'al mi veve racomandât o eri rivât a cjatâlu. Al faseve il so pisolin tranquil in te sale de Venere di Milo e al mi veve dite subite:
- Nol fâs nuie, va vie a la Samaritaine, compre un tele e une scjatule di puntinis e tu le mets parsôre. Pai 5 cm, o disarai ch'a no tu lu savevis e ch'a tu vens dal estero...Ma ce volêso copiâ? E prime di entrâ, al mi veve mitût il stamp dal Louvre daûr de tele come sa nol vès plui nissune impuartance e o eri lí in front di jê cun lui in bande.
- Elle est belle, n'est-pas? al mi diseve cjalantmi ironic. Tal tacuin, o vevi ancjemó le foto pleade in cuatri. A no veve cambiât nancje une cee. O massedavi un tic dut tai miei ricuarts. Le maestre, jê, i miei insiumps a si soreponevin un cun l'âltri.
-Vous ne pouvez pas copier la Joconde. Al mi veve dite prime di entrâ. O scuignivi duncje copîâ alcaltri. Infat, ator di jê, al scomençave a circolâ tante di chê int ch'o mi sintivi imbarazât.
- Venez Monsieur. Par ici.
Une ultime cjalade al gno amôr d'infanzie e o lavi viers la Dentelliere di Vermer cul guardian.
Le foto dal calendari le ai dade al guardian cun vincj francs di ringraziaments. Come s'al mi vês udât a sveâmi o a guarî da un tic niervôs. Lant fûr o ai comprât un'âltri calendari che forsit une dí a m'ispirarà un'altre storie.
Rendez-vous a doman:-)

Nessun commento: