I miei Video clips furlans

Loading...

09 gen 2008

Al mi é zà rivât di scuignî jevâ a buinore par lâ avore. Di fâ colaseon inpins parcé ch'in ritart, di vê un acident par cirî di rivâ a l'ore, di mandâ a cagâ il capo par sfogâmi sù cualchidun, di pierdi il puest di lavôr ma di sei content di vêlu pierdût e chest, tal zîr di dôs trê oris. Ce vite di mone!
Finalmenti, o mi soi dite che so vevi di cambiâ o scuignivi fâlu subite. A é stade dure, ancje avonde pesande par vie de famee ma fasint i conts al mi displâs dome di no vêlu fat prime.
Cumó o mi ievi cuant ch'o ai voe, cioé ancje as 4 di buinore:-), o cjapi lis scjalis par lâ jù al prin plan o al plan teren. O cjapi simpri cé ch'al é plui urgent di fâ ma no lu finis che cuant ch'o sai che il client al ven a cjolilu, cioé miezore prin ch'al rivi:-) Tal fratimp m'in voi achi e alà. Un tic o fâs ceramiche, un tic o pituri, un tic o fâs piruetis verbâls achi sù chest blog e un tic o pastrôcji come un canai, cioé o m'infarini tal ges o tal argile cjantant come un mat dut il dí. Cussí o dismentei ancje di cjalâ i ordins ch'a rivin par mail massime so voi a regjistrâ le ultime ariute ch'a é vignude fûr enfre il polvar dal gès e il rumôr dai imprescj.
Di tant in tant, noblesse oblige, o scuen fâ une mostre e se tal imprin a mi esaltavin il spirit, cumó mi dan scuâsi fastidi ma o scuen ben vendi so ai voe di continuâ a fâ cheste biele vite, no? In te ûltime mostre o vevi fat un concert cul gno ami Manuel e doi dai soi compagns di aventure. Ma us interesial ce ch'o dîs?
Nol impuarte, Vé achi dôs rôsis. Oramai, o puedarès ofrî lis rôsis cun tun gnûf vâs ogni dí, ma no lu fâs parcé che sa devente une abitudin par me, alore o mûr, e sa devente un'abitudin par chei âltris il plasê di ricevi al si smusse come il plasê di dâ. Chest vâs al é l'ûltin. Gaudí al varès di sei content di me. O ai mitût drenti il plasê virîl di pestâ l'argile, di modelâle cui dêts, di fai cjapâ une forme cuant che jê volarès cjapânt un'âltre, di smussâle, lecâle, piturâle e cueile. Cheste chi a mi é lade drete. No si é ofindude ne findude ancje se di ogni bande a é difarent di forme e di spessôr. Miracul? Ma, cuant ch'a si ôlse fâ a si a simpri plui furtune che cuant ch'a no si fâs nuie.
Vé achi dôs rôsis...Mi fâs pensâ a Paul Verlaine ch'al scriveve:
Voici des fleurs , des feuilles et des branches
Et puis voici mon coeur qui ne bat que pour vous
Ne les déchirez-pas avec vos deux mains blanches
Et qu'a vos yeux si beaux, l'humble présent soit doux
Un cjantant francês Leo Ferré, duncje pluitost talian, al veve mitût in musiche cheste poesie.
Lu ai scuviert sù internet dopo ch'o vevi fate la mê version. Ancje so lu vès savût prime o le varès fate d'istès parcé che cuant che une rôbe a é biele al bisugne condividile.

Nessun commento: