I miei Video clips furlans

Loading...

6 gen 2008

Lis aparizions

In tun âltri post achi sot, us ai zà nomenât une vôlte chel cjargniel ch'al va a Medjugorie in Slovenie a preâ le statue de madone ch'a vai. Ce straordinarie ch'a é cheste manie di vê aparizions, veris o falsis ch'a fasin sfilâ le int dute pronte a crodi ancje a es lâgrimis di sanc in tune statue di ges! Secont lis mês statistichis personâls, o vin plui aparizions e miracui in Italie che in dut il mont intîr.
I esperts a disint ch'a partî dal moment ch'a tu i crodis, a tu puès viodi dut chel ch'a tu âs voe. In Inghiltere al sarà un fantasme, in Arabie a sarà une oasi in tal desert, in Americhe un marzian o Bush il redentôr, in Friûl magari l'udinês ch'al vinç il campionât e un'âltri so madone muarte ch'a i ven a tirâ i pîs e finalmenti, un pôc dapardut, le madone tout court...Cuissà parcé po simpri le madone e mai un sant o un diu ? Forsit parcé ch'o sin plui mones?
Justamenti, forsit al é miôr cussí. Lis madonis a no fasin lâ in vuere come i dius. In ogni epoche o vin vût aparizions di ogni zenar. Il Tamerlan, une dí dal 1400 ch'al veve di fa batae, par motivâ i soi soldâts, al veve pensât di fâ come il Gengiscan 200 agns prime e al si é sveât une buinore domandant ai soi siervitôrs se vevin sintût cualchidun cjacarâ in te sô tende vie pe gnot... No, nissun nol veve sintût nuie ma Tamerlan al a contât distès che il signôr a i veve dite vie pe gnot ch'e a varessin vinçût le batae e i soi 12.000 soldâts, convints di vinci a si erin scjadenâts cuintri i cent mil nemîcs e a vevin vinçût.
Gjovanna d'Arco, tal stès secul, secont i esperts di vuê, a veve un spirit cussí esaltât che jê a ere convinte di viodi l'arcagnul Gabriêl e sante Caterine ogni setemane come nô o viodin il pape ae TV a l'ore dal caffé ma par finî, come ch'o savin a no i é lade masse ben. Chest juste par dî che lis aparizions che somein plui veris, a puartin mancul furtune che chês inventadis. Inventadis?
Di indulà nus vegnino chestis aparizions? Al sarès forsit interessant di pensâ a lis primis ch'o vin studiât nô, cristians o romanins, cun le storie di Gjesù, ma so si ricuardín Mosé, lis aparizions a son rivadis 1500 ains prime.Dutcâs, chês che plui nus an puartât fastidis a son lis aparizions che 200 ains dopo che l'impero roman al si ere disfat al a vût un arabo profete. Chest arabo al é rivât a fâ crodi che il so diu a i aparive e a i diseve di atacâ i caravanîrs par depredâiu e al é cussí che pôc a pôc al a scomençât ancje lui a conquistâ il mont a nón di Allah.
Ognun al à vût il so profete in ben o in mâl e al si disarès che chiste manie no é pronte a svanî. Baste viodi lis vueris ch'a in d'é chi e là e chês ch'a si stan preparant.

Nessun commento: