I miei Video clips furlans

Loading...

3 feb 2008

Il BoingBoing dal net


- Cuant che lis copiis a son super abondantis, le rôbe ch'a no si puès copiâ a devente plui rare e a cjape plui valôr.
- Cuant che une rôbe a é super copiade o a é tirade in serie a devente zence valôr.
In principi, al é cussí ma cun internet al é ancje il contrari. --
-Ce ch'a no si puès copiâ a nol interesse. Infat, parcé si varessial di paiâ s'a si puès cjatâlu gratuitamenti? ...E sa si cîr alc a si rive simpri a cjatâlu.
Cun chest, dut ce ch'al sucêt tal nestri piçul mont furlan , s'al và sù internet al và par simpri. Il fat di mandâlu da un pont a chel âltri dal net al ûl dî ch'al devente incancelabil e al si cjatarà simpri di cualchi bande a galegjâ o a svualâ.
Il mont al é ormai fat cussí.Prest, sa no tu stâs atent ancje il to minim coreot al sarà regjistrât e par cjatâ un lavôr il to gnûf paron al varà bisugne dome dal to non parcé che dut il rest lu cjatarà di besôl e guai sa nol cjatàs nuje, a nol cji cjolarès.
Ogni sbit di bit s'al é in contat cun internet al reste tacât par dute le vite. Ce vite? No dome le nestre ma le vite de societât umane dute interie. O podês oramai murî doman, dut chel ch'o no vês mitût su internet al riscje di pierdisi plui adore che chel ch'o vês mitût.
Internet a é une machine a copiâ formidabil e ce ch'o vês mitût, al puès simpri interessâ cualchidun. Le sbitiade dal Prodi sule tassazion dai blogs aé colade in tal ridicul parcé ch'a nol sarès pusibil di controlâ nuie. Il sisteme di distribuzion ch'al regule oramai il svilup de nestre economie al é basât sù internet e par chest, chei ch'a son plui indenant a fasin ancje plui afârs. In Americhe, ancje un ch'al sta in tun paisut di 50 abitants al a l'adsl e le difarence di funzionament a si viôt subite quant ch'a si rive in tun sito american. A pene ch'a tu rivis a cji disin subite clic here, ordene achi, download là, pae achi e a tu lu fasis parcé ch'al é esatamenti ce ch'a tu sâs ch'a tu âs voe di fâ.
- In Italie, o sin ancjemó al medio evo. I sitos a scomencin cussí: Chi siamo. E a scomencin a fâcji le liste di dute le famee fin al cjan di vuardie. Po a cji disin cemût che il sito al é otimizât tal câs ch'a tu âs bisugne di un pâr di binocui, a cji metin in vuardie ch'a sa tu copiis ce ch'a disin a tu vâs in prason tal câs che par lèi al cji bisugne un avocat e a finissin par declarâ che lôr a son in regule cun le leç, ch'a son regjistrâts, tal câs ch'a tu sedis un finançot e vie vie... Ma vendino alc, ce fasino? A no si sà, il sito al é simpri in costruzion. Piês, tu cji sês sbaliât di pagjine e a tu lu viôts dome cumó ch'al é zà miez'ore ch'a tu sês aí a sgarfâ come un poleç. A tu i disarès ben a chel webmaster dal asilo nido ch'al ledi in mone ma chel al cji a mitût l'e-mail ch'a nol funzione o no cj'al a mitût par nuje par pôre di vê une publicitât. Come vê une machine tal parchegjo e no doprâle par pôre di pierdi il puest tant ch'a tu sês vie...Alore vie di aí. Ma sa tu crodevis di svignâte cussí, a no tu rivis a cambiâ le pagjine ancje fracant il grilet di une mitrae.
Francjamenti jó no blestemi mai tar chês âltris lenghis ma so lu fâs in Italie al é ancje par chel.
Oramai, un creadôr, un artist, o ben al sta tal so cjanton zence che nissun al savedi ce ch'al fâs e al si ten dute le produzion par sé, o ben a lu fâs savê par internet indulà ch'al puès metilu a disposizion dal mont intîr e naturalmenti fâssâl copiâ. E alore? O crôt che a i restarà simpri l'origjinâl, e che il concert dal vêr al varà simpri il so valôr e al sarès ore che in Italie a si gambii di mentalitât. Vonde sitos di musiche indulà ch'a no in d'é nancje une note, o cessos di sitos indulà ch'a no in d'é nancje le cjadene par tirâ l'âghe.
Par calmâmi o soi lât dal miedi. Un ch'al é il plui grant blogarin dal mont. Cory Doctorow, un rus dal Canada istalât a Londre (come dî un cjargniel di Udin istalât a Triest) e ch'al dimostre ae trentine sunadissime ch'a si puès vendi best sellers (Al a scrit 6 a 7 libris di fantascienze) ancje se lui ju a mitûts gratuitamenti sù internet. Secont Berluscon, chel ch'a nol passe a la TV a nol esist. Secont Doctorow, sa no tu sês sù internet a no tu sês di nissune bande. Cui aial rason? Il fat al é che, lu ai sintût dî par lui stès: -Par sei popolâr a tu âs di cjacarâ dome di rôbe popolâr. Guai a fâ l'inteletuâl. A nol cjape. Of course, dissal, chest al dipent dal livel d'istruzion dai letôrs. Ce ch'al é popolâr di une bande al puès sei ridicul di un'âltre e dut al sta tal cjatâ il livel ch'al covente. Come che da nô il livel al é chel de television ch'a si à, ce sucedial?
So lais tal blog dal Grillo, o viodarês che ancje le sô version par inglês a é frequentade dome pai talians parcé ch'al cjacare dome des rôbis popolârs talianis. Ch'a sedin miardis par chei âltris? Dutcâs, par fâ ancjemó plui confusion, vé achi cualchi numar (Technorati):
Boingboing - 19.157 (Ancje plui di 10 poscj in di)
Grillo - 13.410 (Un post in dí)
Furlanist - 92 (Ancje 4 poscj in di)
Furlanâr - 19 (Ancje zero poscj in dí:-)
Continuait vualtris e diseitmi so cjatais alc di plui divertent da copiâ che la tor Eifel made in China.

3 commenti:

Anonimo ha detto...

e pensare che non ci sono ma salita, sulla tour Eiffel!
Buona giornata Jaio
capucine

JuaKo! ha detto...

Aunque no entiendo el idioma....me gustan las fotos jej e (te vi en el blog de anaggxD) saludos

Profondoceano ha detto...

Ma che lingua è?

http://veritasegrete.splinder.com