I miei Video clips furlans

Loading...

16 ott 2008

Udine fossilizzata dissal Grillo


Cê ch'al fâs ridi i furlans
-Udin al é fossilizât, dissal Grillo, daspó ch'al contave che par miezore al a scuignût cjacarâ di bessôl tal mieç dal "solitUdin" desertic.
E jù a ridi i 3500 furlans dal Carnera!
So lu varès dite jó nissun al varès fat un bê. Como simpri, le nestre furlanitât a é plui vere s'a jès de bocje dai forèscj. Ma vino propit di ridi sardonicamenti cuant che invesit a si varès di vaî? Daspó, al dîs Grillo che Udine al si dîs Udin, che vigile al si dîs vigil ma che mone al reste compagn. E jù ancjemó 3500 ridadis tant che Carnera al si zire e rizire in te sô tombe!
S'al vès dite che mone a si dîs frice al varès fat ridi cun plui plasê ma vino veramenti bisugne de veretât par viodi trop mones ch'a si é? Nô o ridin d'istès!
Ridi sardonic par no vaî disperât?
- La prime presentazion de Patrie, che o vin fat a Sant Denêl, mi à pardabon sodisfat, dissal Christian tal so blog. Achi nissun al rideve. Ni chei 6 sentâts par cjacarâ, ni chei 15 sentâts di chê âltre bande.Robe masse serie e nissun Grillo par contâ 'ne monade.
Cuâl sarae le prossime ridade? Chê dal funerâl dal ûltin furlan?
Se invesit di sei furiôs o sin juste Fùrios o no varin di spietâ masse...Gri, Gri, ven fûr di aí !

8 commenti:

Matieu ha detto...

No ài sitût Grillo (no mi va di straçâ beçs par viodi un comizi no tant seri) e no soi rivât a vignî ae presentazion de Patrie.
Dut câs la to riflession è juste. Sarès di tirâ fûr cualchi gnove idee.

ILfurlanist ha detto...

Matieu, sclarissimi cuale che je la riflession tant juste, che no le ai capide: si paragonin dos robis imparagonabilis cussì a câs par sbarale. Ce erial di ridi su Tellini?

Jaio ha detto...

Il paragonabil al é il vueit di Udin cul vueit di san Denêl. Il paragonabil al é le mancjance di furlans di une bande come di chê âltre, il paragonabil al é cuant ch'a si si mostre sodisfats (Ancje sa no si rit simpri) cuant ch'a si varès di lamentâsi. Ce ch'a nol é paragonabil al é chê dai furlans ch'a van a paiâ 30€ par fâsi cjapâ pal cûl par talian e ch'a nondé nissun par lâ a sintî furlanâ i furlaniscj o furlanons di bant. Nissun nol voleve sbarâ a vueit ma dome fâ un lament. Mandi

Matieu ha detto...

@Dree
Jo pensi che Jaio al vedi reson cuant che fevele des pioris che bebein daûr dal Gri. Cun di plui che un amì dal meetup di Udin mi à contât che cumò nissun al intindi fâ nuie di plui che paiâ il biliet e bati lis mans come un simiot.

Il discors de Patrie è une altre robe, tu às reson. Ma par me al à reson ancje Jaio a dî che se un pipinot rive a jemplâ cence fadie il Carnera par spudâ in muse ai Furlans intant che no si rive facilmentri a meti adun plui di vincj personis par une serade culturâl, chest volarâ ben dî alc.

P.S. Par me se chel om (Gri) al vessi dit alc dal gjenâr dongje Napoli nol sarès tornât a cjase cu lis sôs gjambis.

ILfurlanist ha detto...

Ah bè, jajo, cumò mi è ancjemò plui clare: imparagonabii.

Par Matieu. Chê che Grillo al "rive a jemplâ cence fadie" il Carnera mi pâr gruesse, viodût la promozion, i bêçs e il team che al à daûr, ati ce fadie (e professionalitât). Soredut dite di te: simosù!
E la conseguent "no si rive facilmentri a meti adun plui di vincj personis par une serade culturâl", madonute... e je une retoriche minude e, chê sì, facil.
Scuasit scuasit mi fasês vaî... sniff sniff

ILfurlanist ha detto...

PS: a chei dai Meetup i sta nome ben, dordei. ah ah ah

Matieu ha detto...

Uhmm... dî che Grillo al rive a jemplâ un Palasport o una plaçe in fuarce de so organizazion è vere dome in part, in minime part. Di fats lui al è rivât a cavalcâ par bravetât e par furtune l'onde da l'antipolitiche par mieç dal so blog e chest al à determinât grant part dal so sucès. Dis agns indaûr cul caz che al varès iemplât un palasport intune citât di province.

I fatôrs che si pense che vedin determinât il resint sucès di Grillo a son principalmentri doi:

1. Il fat che al vedi viert il blog prime de saturazion de blogosfere, in ogni câs intun moment favorevul.
2. Il clime favorevul ae antipolitiche che involuçave l'azion dal guvier Prodi.

Fas notâ che cumò l'atenzion rispiet a Grillo (che ancje ca a Udin al à anulât la seconde date, organizazion aspart), insume il so sucès, è in fase calant e si pense (amancul cussi a scrivin Repubblica e L'Espresso) che chest sedi determinât dal fat che se une part impuartant dal Paîs podeve sentisi tradite di une cjampe che al faseve l'indult cuntun guvier di 102 membris (un record), cumò nissun si scandalize par lis leçs ad personam dal guvier corint, da la storie di Alitalie (amancul dal pont di viste dai azionists) e vie indevant, parcè che è normâl che la diestre di Berluscon a fasi chestis robis.

Prime dal blog e da la antipolitiche Grillo tai siei recital fevelave soredut di ambient. Di incinisadôrs (chei che secont lui fasin immalâ la int), di gjestion domestiche dai refudons, racuelte diferenziade, infrastrutturis che no funzionin, e difiets dal sisteme politic talian. Al jere un comic vieli ai margjins dal star system dominât cun merit di Aldo Giovanni e Giacomo e cualchidun altri. Daspò par une cumbianzon a lui favorevul al è rivât adiriture a viodisi publicade une interviste personâl tal New Yorker, robe di no crodi.
La so organizazion conte duncje une vore di mancul dal clime culturâl che si à creât indipendentementri di lui che al à soredut il merit di velu doprât par tirâ dongje un grum di beçs.

E al è propri chest clime culturâl che mi conturbe parcè che o ài un refût interiôr par la demagogje di Grillo che nol fas altri che denunziâ e proponi soluzions delirants par problemis une vore complès. Par chest no rivi a fâ di mancul di notâ che mi somee assurt che in 3500 a vadin a butâ vie 30 euros par sintî un pseudocomizi comictragipolitic.

Lassant a part la serade di presentazion de Patrie (no jeri e no sai in ce maniere è stade fate publicitât, e in ogni câs è stât dome un inizi) o pensi che sutun blog al sedi ancje pussibil butâ une frase gjeneriche (fas part dal lengaç dai blog, no è retoriche) dome par fâ notâ la difficoltât a cjapâ su l'interès de int su temis o cuistions che no passin pai media mainstream.

ILfurlanist ha detto...

Grillo al à nasât la clime di antipolitiche e al à voltât i argoments di cui al trate in chel sens. In gracie de organizazion che al si è dât cun la sô redazion.
Podopo ovvio che si va a periodis. Il blog nol è che un dai mieçs che al à doprât.
Su la afermazion "Dis agns indaûr cul caz che al varès iemplât un palasport intune citât di province" mi plasarès lâ a viodi i dâts di 10 agns fa: Grillo al à simpri emplât palasports, ancje di provincie. In chest periodo di plui, clâr.
La sô popolaritât in ribas? Rispiet al boom dal an passât sì, ma no tu puedis zudicâ dal moment plui alt.

(Oviamentri, prime e cumò, in gracie de retoriche populistiche, ma cuant che al spacave i computer al jere di front a une biele platee. O ai controlât: al sucedeve intal 2000: scuasit 10 agns fa)