I miei Video clips furlans

Loading...

22 giu 2009

Simpi sotans

-Invesit di fâsi perdonâ a vegni a sfoti.E nissun al bae!
-Ducj sul atenti par onorâ i nemîcs

Le ûltime freade ch'o vin vût dai ungjarês al é il nestri tocai. Di fat, nissun al puès dî che lôr a no lu vêtin bielzà robât da nô mil agns indaûr cuant che par cent agns a no si son mai fermâts di vignî jù a fâ macèi in Friûl. E nô, bacons di mones, o sin simpri dacuardi par lassâsi fâ. Ansit, ju ricevin cun ducj i onôrs. Brâfs chescj ungjarês. Un mês fà ju vin ancje festegjâts pe screadure de lôr capele a Oberdó. Lí, par ogni ungjarês muart pe Austrie, o vin pierdût plui di dîs talians par nuje. Duncje, a si scuignive onorâ chescj brâfs nemîcs di simpri. A son mil agns ch'o vin imparât a fâ sito e a lecâur i stivâi. Alore eco i nestris volorôs militârs plens di medais faur da spuinde sul'atenti tant ch'a passin lôr. Eco i pulitics insiarpâts di tricolôr e di mûsis funeraleschis par fâur onôr. Eco i prelâts plens di aurs e plens di panse di vilût a menâ le cerimonie par screâ le capele in memorie dai nestris nemîcs che, biâts puaríns, a son rivâts distès a murî dopo vênus massacrâts dîs vôltis di plui.
Prosime tape: 
-I ungjarês ch'a fan da spuinde a Redipuglia a l'ûltin soldât talian ancjemó in vite?
-I palestinês ch'a viergin une sinagoghe in Palestine par celebrâ il muart israelian ch'al à copât cent palestinians prime di murî? Scherzino? A son ben masse fiers par chest.Altri che nô!
Nô, ce nus restial par jessi fiêrs? Nancje il frico! No îsal daûr a deventâ olandês cence che nissun al si vôlti?
 Duncje, se l'udinês al piert, a si lu cjate normâl. O vin simpri pierdût, parcé si varessial di vuadagnâ? Chiste a é le nestre mentalitât. Fâ cusso e fâ stâ cusso ducj i furlans ch'a volaressin alçâ il cjâf.Tant al vâl celebrâ chei ch'a lu meretin.Ancje un Ungjarês. 
Un mês fa, il nestri president, aromai ben sentât tal so puèst, al veve sul so blog le fierece di mostrânus l'aveniment e, no ai dite nuje par no disturbâ ma, so viodês lis fotos, daspó o lais sul blog de storie furlane, po tal sito di Aldo Taboga e o vês in ment ce ch'al diseve Lelo Cjanton sul spirit di sotans ch'o vin, o scuignîs dî alc. Diseitlu! 
Lelo Cjanton, tal so libri Plùrin dal 1998 al spiêghe ben le nestre mentalitât.Chiste pôre ataviche di scuignî cjapâlis e sotometisi, nus sburte da mil agns, invesit di unînus par sta insiemit e combati, a nus divît e nus fâs deventâ nemîcs di nô stès. .
- Guai al furlan ch'al alce il cjâf, al dîs Cjanton, al sarà subite cjapât pal cûl, o dîs jó, sbassât, butât jù, ridût...Copât dai soi stès compaesans. Al cite Josef Marchet dulà ch'al dîs che par vie di chest o sin restâts dusinte agns indaûr dal rest da l'Italie par un grum di timp
Alore, par no dâ fastidi a un pulitic che par une vôlte al é ancje cjargniel come me, no mi soi permetût di ridi viodint chiste mascarade ch'a somee ae ingjenue rapresentazion teatrâl di une scuele elementâr ae fin dal ant.Ma jó o soi un artist. Lui al é un pulitic. Jó o soi fat par sintî plui fuart di cê ch'al covente tant che lui al é fat par sintî di mancul di ce ch'al bisugne.
O scuegnarai alore lâ a scusâmi se lui al é vuarp o sort prime che cualchidun al mi disi ch'o fâs masse bacan cuant ch'o pensi.
Chiste gran melancunie penetrade tal gno cûr, jó no puès parale vie, jó no puès parale fûr.
Pasolin

3 commenti:

Anonimo ha detto...

Mandi Jaio
Me none a mi contave che i omis di Durlasse, a un ongjar, ai vevin molat un grun di pachis. No mi veve dit quant, ma si tratave dal 1797. L'ongjar a l'ere un comandant dal presidi frances e cussì al faseve un grun di angheriis, soredut tai confronz da li feminis.
Le robe a è finide in pies, parcè l'ongjar a l'è muart ma i responsabi non son mai staz cjataz.
Di chistu fat, un miò amì di Durlasse, Federico Bernardis, a l'à tirat for une comedie par furlan.
Done Bete

Jaio Furlanâr ha detto...

Done Bete, nol é ch'o le vêti cui ungjars in particolâr (O ai doi dai miei miôrs amîcs ch'a son ungjarês e scuâsit o imparavi a cjacarâ l'ungjarês cun tune mule di Buda da zovin). O mi soi dome scjaldât un tic lant par chei blogs.Buine zornade.

Anonimo ha detto...

si, mi visi che tal miò post cal conte di un viaz in Ongjarie tu mi as scrit che i tios amis a ti invindin a là a cjataiu.
Mandi
Done Bete