I miei Video clips furlans

Loading...

03 dic 2009

Le cjampanote / La Campanotto

Le Marine a é une spilungjone de Ucraine ch'a ven da Odessa. Il so óm le à bateade Cjampanote parcé ch'a é âlte come un tór e ch'a no si ferme mai di sunâi lis cjampanis.

A jere professôr di informatiche prime ch'a si maridi cun tun professôr di no sai cê e po cun cualchi âltri fint a rivâ a chel di cumó che a spere, al sedi il cuint e l'ûltim , mi dîs 'ne sere.

- Ancje se a lui a no i plâs ni le liriche ni nuje e a nol larà mai al teatro cun jê, a mi zonte.

Da cuant cho i ai dite che il compositôr napoletan Eduardo di Capua al veve componûde le so cjançon « O sole mio» a Odessa tal 1898 a si é mitude a studiâ il talian ma no i ai dite che il gno acent napoletan al jere furlan e d'in chê dí a mi trate come so fos il Capua e a mi invide al teatri une vôlte par setemane sperant che forsit dopo il cors di lenghe o i cjanti une serenade tornat a cjase.

Tant jê a no pae. A invide e vonde. E jó o pâi il gno e o jentri tant che jê a và de sô bande. Cemût fasie par jentrâ? Jo no sai, a volarès ch'o ledi cun jê par mostrâmi cemût ch'a si fâs, ma cul so metro e novante cinc e il gno metro e setante e mieç no mi sint da tignîle pe man par lâ cun jê cuant che no lu fasarès nancje sa vignís cun me.

Seont ce ch'o ai capît, a spiete che il spetacul al sedi scomençât e alore a jentre cun le sô gjachete pleade in te so borse e le so borse peade in te sô spâle. Come sa vignîs fûr dal bagno.

Sa i domandin il biliet a dîs ch'a lu à lassât drenti par lâ tal bagno...O cê ch'a ûl, baste ch'a no vegni a dî che il gno biliet al é il só.

Chê altre dí, mi veve menât a viodi i balets rùs, indulà che, o sorprêse, a vevin ancje lôr un balerin nêri ch'al svualave jenfri il lôr Romeo e Gjuliete come un Kaka sul cjamp dal Milan.

Da mê galerie al secont plan e secont ordint, o cirivi le Marine cui canocjâi par viodi indulà ch'a si jere sentade, e indulà si jerie sentade? Te prime file di front al palco. Cence complès.Indulà che i biliets a costin sui...No ai voe di savêlu.Cagne dal osti di une Campanoto!

Lant fûr po, a mi contave esaltade cemût ch'a jerin biei i muscui dal cûl dai balerins che di sigûr, a doi metros dai soi vôi, a i davin plui tal cjâf a jê in bas che nó a mi tal âlt doi plans plui in sù.

Cjaminant sul marcepît par lâ viers le machine, tant ch'a mi descriveve cun lis mans e cun le lenghe emozionade ch'a no veve mai vidût cussí biei cui in vite sô, a no si jere indacuarte che de penombre in front di nô al nus vignive incuintri un nêri vistît di scûr. Cussí cuant ch'al é rivât ae nestre altece, al à jevât sù lis ceis par cjalâle e jê ch'a no lu veve nancje vidût rivâ, viodint chei grancj vôi blancs ch'a le cjalave da cussí dongje e à vût un starlùp dal ram e, a à cjapât cussí pôre, ma cussí pôre, che a à dât un ciulon da fâmi voltâ il stomi.

Daspó, simpi pronte ae improvisazion, par gjustificâsi cun lui,cun me e ducj chei che li ator a vevin vût un spachet, e a zontât palpantsi le borse: - Joi, no mi soio dismenteade lis clâs di cjase?

Alore jó ch'o mi palpavi il cûl par viodi s'o no jeri masse andicapât,mi soi mitût a cjaminâ devant di jê par rivâ te machine... Prime ch'a si visi che i vôi dal nêri a jerin chei dal cûl dal balerin.

Psst: Se cualchidun al ûl voltâle par talian, ch'a lu fasi, o le metarai achi sot parcé che vuê o no ai timp par fâ voltaduris.

1 commento:

Anonimo ha detto...

Mandi Jaio, mi sa che tu sôs ator di cualche bande se îr e vuei no son posts gnoufs!
Mi contave un omp che cumò al è su la 70ine che di frut, lui e altris in cumbricule, a rivavin a entrà al cine a Tisane cun tun biliet sôl, simpri cu la scuse dal bagno.
Cumò o ai apene sintût tal telegjornâl di un clochard che a Parigi a si faseve passà pa l'assistent di un emir arab e cussì al si ere fate une biele vacanze tan un albergo di lusso.
A mi l'inzen e le muse rote a mi fasin simpatie.
DoneBete