I miei Video clips furlans

Loading...

25 feb 2010

L'amôr dal Art

From Cimitero dei barconi. Le Guilvinec
Cinc pitôrs a vevin decidût di lâ trê setemanis a piturâ in Bretagne. Un di lôr al veve fat il viaç cu le so mule ma rivâts a Quimper a le veve tornade a mandâ indaûr parcé che lui al podeve piturâ dome prime di fâ l'amôr e cun jê al varès fat plui sès che art parcé ch'a jere masse biele. Alore vie, indaûr!
Jenfri l'amôr da l'art e l'art dal amôr, al veve sielzût. E pó, ducj chei âltris a jerin cence feminis. Vie!
Daspó, ducj i albergos a jeris plens e al scuignive durmí in te machigne. Vie!
Ogni sere al lave di front dal ocean, al si sierave in machigne, al sbassave il schenâl, al vierzeve un tinin lis balconetis e al s'indurmidive cjalant lis stelis pensant ae ûltime vôlte ch'al veve fat l'amôr cuintri chel mûr cu le so mule,prime di metile sul tren a vaî di bessole.
Ogni buinore al si sveave cul sorêli tai vôi, il rumôr des ondis tes vorêlis e l'odôr des alghis a pene rivadis sui claps jenfri il mâr e le strade. Dopo vêsi distirât e ridistirât a i bastave dome lâ vie in te âghe a glaçâsi le bocje da ridi ch'a i vignive di fâ pensant ch'al veve vût furtune che i albergos a sedin plens e pó si glaçave il cuarp par no pensâ ae contentece de so mule se a ves viodût le sô voe matinâl che cucave fûr des mudandis.
In chê gnot al veve plovût e al veve scuignût sierâ ben i finistrins des puartis e dal tet e al si jere sveât cul odôr de trementine e dal vueli di lin doprâts cui colôrs dal sô ultin cuâdri che nol jere ancjemó sut. Nuie abluzions, al veve di viodi ce ch'al veve fat le sere prime. I pareve che al fos stât piturât da cualchidun âltri. Cemût erial pussibil che al sedi rivât a jessi un spadacin dal pinel? Lui, che al veve simpri pôre di ferî le tele, cemût erial rivât a finî il combatiment in trê oris? Le lûs, le sere a gambiave ogni cuart d'ore e al jere obleât di movisi prime ch'al vegnedi gnot. Eco cemût.
Ma d'in chê dí al veve scomençât a crodi che forsit, cuissà, al stave forsit deventant un maestri e dí dopo dí al tornave a scomençâ par viodi se jere vere. Altris cuâdris a jerin nassûts e muarts cun âltris mulis e âltris amôrs e âltris pitôrs a di lunc dai agns ma chel cuâdri a lu veve simpri cun se parcé che a nol veve mai volût vendilu. Se mai une dí, al cjatarà che mule a i al darà a jê.Sigûr.

1 commento:

Anonimo ha detto...

che vertigine osservare la strada così dissestata...

buon week end Jaio
c.