I miei Video clips furlans

Loading...

18 ago 2010

Le Logjiche e le Filologjiche Furlane


Mi soi abonât ae Filo ma le logjiche mi mancje par disi chi soi content al 100 %. Anzit s’o fos content al 20% al sarès bielzà alc ma o lu soi ancje di mancul par vie che o speravi cjatâ tes publicazions de Filologjiche avonde furlan par passimi il cjâf e il spirt ma tar cheste venerande istituzion a si dopre scuâsit dome il talian. Tal ultin numar di Ce fastu su 140 pagjinis, dome cinc pagjinis a son par furlan e chest graziis a Sandri Cjaroç che o batei cussí parcé che se lui nol fos a tirâ il cjaruç a nol sarès nissun li ator.
O ai viodût che aromai, a si tint a doprâ il furlan dome par fâ i titui e daspó i articui a son scrits par talian. Chest ancje par cjacarâ de lenghe furlane stesse, de pronunzie furlane e insomis, fllogjicamentri o sin mal mitûts. 
A si fâs plui culture taliane che furlane.
Si disares che il furlan a son daûr a soterâlu prime inmó ch’al mori. Come s’al fos latin e ch’al fâses trendy di mostrâ che a si lu cognós  ma che al fâses démodé  di doprâlu parcé che a no si pos  (Le pronunce dal verb ae cjargnele a é fate par fâ le rime).
O pensavi che forsit, le percentuâl des pagjinis furlanis a jerin proporzionadis cui sussidis ricevûts ma nó, nuie, I sussidis dal an passât a jerin di 556.000 euros e lis ricetis di 216.000, duncje si varès vût di vê amancul il 75% di pagjinis par furlan ma il massim al si rive al 25%. Piês, a si si permet fintramai di fevelâ sule leç 482 in tun articul di 25 pagjinis dutis par talian! Come se si fos sul Gazetin.Francjamentri, chei di Rome a si caghin dal ridi disint che a si reclame plui marilenghe ma no si é nancje bogns di doprâle ! 
Cun cheste logjiche, se cun 500.000euros a si à il 25% di pagjinis furlanis, le Filo a puedares dî che par rivâ al cent par cent di pagjinis furlanis e varès di ricevi doi milions di sussidis. 
Eh si sí ! -A disaressin chei altris, cun tune aumentazion dal 75% ce restaressial par nô? 
Al bastarès disi che, cu le stesse logjiche, nô blogarins e patriots dal Friûl che  o s’intestardin a scrivi dut par furlan, forsit ju fasin ridi ma a si puedares rispuindiur che o fasin plui culture furlane nô a gratis in tune setemane che lôr cun 700000euros in tun an.
Jo chi stoi in tun paîs indulà che lis lenghis ufiziâls a son finanziadis des comunitâts e o sai che a nol vegnarès in ment a di nissune istituzion culturâl di no doprâ le lenghe pae cuâl a ricevin i sussidis parce che a saressin tajâts vie subite o scuen zontâ, parcé che o soi simpri furlan, che a é ore di gambiâ. I politics che cirin di sparagnâ tai sussidis e varessin di cjoli le ocasion par meti un tic di ordin e imponi amancul un tant di furlan par franc ricevût. Se po a son euros, tant miôr.


3 commenti:

Giulia ha detto...

Robones, neancje di crodi.
Jaio, ce vino di fa?

Chi i prins a predicjà ben a son chei che ai no interese nuje dala lor lenghe "mari".
Jo i tabai simpri in furlan a cjase e cun chei ca lu cognosin e i soi sigure che lu insegnarai ancje ai mei fis, se i varai la fortune di veju.

mandi

Jaio Furlanâr ha detto...

Il biel al é chê publicitât che si cjate drenti e che a mostre un mostro ch'al dîs: Il furlan al é to, tegnilu ben strent!

c.s. ha detto...

mandi jaio
ancie jo mi domandi simpri
ce bisugne che àn di ducj chei bes?
e cui che ju met vie?
boh.
me mari mi à insegnat a tabajà furan
ma no mi à mai dpomamdat un carantan.

maman.

pat