I miei Video clips furlans

Loading...

30 nov 2010

Colps di vôi su Marcinelle / Colpi d'occhio su Marcinelle / Coup d'oeil sur Marcinelle


Vêso zà sintût fevelâ di Marcinelle?
Il Bois du Gasier ribateât Casier par no puartâ scalogne cul gâs al jere il non de miniêre ma le scalogne a é rivade distès. Jenfri i 262 minadôrs muarts 136 a jerin talians.
  Fin tai agns 60, il Belgjo al doprave un grum di minadôrs tes sôs miniêris di cjarvon. Un grum di lôr a jerin talians e ancje furlans e cjargniei lâts vie dopo de vuere. In chê vôlte, le energjie pes fabrichis e il riscjaldament pes cjasis al vignive dute dal cjarvon e il cjarvon, a part in Gjermanie, indulà che al bastave cjolilu sù par tiere cence fâ bûsis, al costave un frac di manovâi par lâ a cirîlu ancje a 800m sot tiare. Si dîs che i doi guvierns, talian e belga, a vevin fat un acuardi e che sôre di un operari mandât in Belgjo, l'Italie a riceveve un tant di vagons di cjarvon.Fortune che un grum di minadôrs tai agns 60 pierdint il puest e an vût une pension cussí âlte che tornant in Italie a vivevin come siors.
O ai un ami belga che al sta a Marcinelle e no soi mai rivât a capî cemût che un poete come lui, al rivas adore a vivi in tune vile cussí anonime e par dî le veretât ancje avonde brute.Dal rest, Marcinelle a fâs partide dai comuns che son ator di Charleroi, une des vilis plui brutis de Europe. I carologjinês, abitants di Charleroi, a clamin le lôr regjon Le pays noir, par vie che le tiere a é veramentri nêre dapardut. Dutis lis colinis li ator a son artifiziâls a somein a grandis tetis nêris e a son stadis fatis cu le tiare estrate tes miniêris par cirî il cjarvon. Le foto achi le ai cjapade lant sù di cualchi metro sun tune di chestis colinis e il puest al si cjate juste al limit jenfri Marcinelle, Charleroi e Mont-sur-Marchienne. Li, ancjemó vuê, fitâ un garage par meti le machine, a coste plui cjâr che no une cjase par vie che nissun nol ûl lâ a stâ tar chel incuinament e alore a si cjate facilmentri une cjase ma dificilmentri un garage.
A Marcinelle, in te miniêre lancurosamentri celebre dal Bois du Cazier, e an fat un museu  su le industrie e su lis miniêris che al é di spes visitât pai fruts des scuelis. 

2 commenti:

DoneBete ha detto...

Mandi Jaio,
controlânt l'an o viôt che la tragedie di Marcinelle a je capitade tal '56, come l'afontamênt da la Andrea Doria. Jo vevi cuatri agns e mi visi ben lis notizis ca vegnivin datis in radio. Plui in lâ tal timp o vevi un vicin di cjase, cal jere stât in miniere in Belgio, e al jere malât di silicosi.
Un dai sindics di Palaçul, ma la famee origjinarie di Tarcint, al je nât juste a Charleroi.
Mi visi la cjanson ca diseve
"Nella miniera è tutto un baglior di fiamme,
piangono bimbi, spose, sorelle e mamme.
Ma a un tratto il minator dal volto bruno
dice agli accorsi: "Se titubate ognuno,
io solo andrò laggiù, che non ho nessuno"."
e jo, di frute, o pensavi ca rivuardàs le miniere dal Belgio, ma controlânt a jere stade scrite ancjemò tal '30.

Jaio Furlanâr ha detto...

Jó invezit o ai sintût chiste cjançon in tal sud de France, in tun paisut indulà chi jeri a piturâ cun 4, 5 altris pitôrs. Un muradôr sardegnûl a le cjantave ogni sere cun le ghitare. Le sûr di un di nô,al à finît par sposâlu:-)