I miei Video clips furlans

Loading...

24 gen 2011

Le calme domenie / La domenica tranquilla


Tal prât un frutin al cor dut content di vê a pene imparât a cjaminâ.Sô mari sgrufuiade lu spiete cui braçs tindûts e une bocjute da ridi. A pene che il frut a i rive dongje al si bute content cuintri di jê. Jê  lu strenç, lu busse, lu trai pal aiar di contentece po a torne a metilu par tiare  e a si sposte di un'altre bande par invidâlu di gnûf a cori da jê. 
Un omp , tal viâl al cjale le scene cun tun vôli tant che cun chel altri al si prepare  a dâ une starnudade. Ma ae sô renzade, il canai devant di lui al cjape cussí pôre che al piert il control des gjambis, al cole e le sô bocje dal ridi a passe al vaî. Le mâri a cor a cjapâlu sù tant che l'omp al cor vie cuntun  scûse che nissun al sint. 
I ciulons de machine de polizie a insistin  a rompi lis vorêlis come se le sirene a ves voie di fermâsi lí. Cualchidun al fâs ne smorfie di disgust stropantsi lis vorêlis tant che lis machinis a fenzin di dai il passaç te strade e finalmentri le pulizie e passe sul marcapît. Al prin plan di un condomini un omp al vierç il barcon e al sberghele fûr cun ducj i palmons mostrant il pungj: Miardeeeee! 
Po al siare cun rabie.
Dôs feminis a spietin che le sirene a si calmi par tornâ a cjapâ le conversazion, sorprêsis di sintî chel berli  a si cjalin, a alcin lis spâlis e po si metin a ridi. Une e à un frutin che al duar te carozele cul cjucj te bocje , chê altre e à un cjan che al uiche impazient di lâ a fâ un zîr. Chê dal frut  a conte ae sô amie le sô contentece: 
-Vuê il frutin al à fat i soi prins pas.
- No! 
-,Si sí, e cemût che i plaseve di podê cjaminâ!..
Ma un avion al passe fasint sgurlâ i vêris, scjampâ i ucei e impaurî i gjats.  Il cjan de amie al tire sule cjadene par  entrâ e meti lis sôs vorêlis al ripâr ma le so parone a no si mûf. 
- Miardeee ! Al sberle inmò une vôlte chel om viers l'avion prime di sbati il barcon par no fâ sintî il non di diu che al zonte cun alcaltri. 
Lis dôs feminis, a si spostin par podê cjalâ sù cui che al cride cussí ma l'om al à bielzà sierât il barcon e lôr no viodin nuie.
Lis dôs feminis a continuin a cjacarâ.Une a fâs sí cul cjâf tant che chê altre a fâs nó come par dî ce mone che al é. Po a tornin a cjapâ le conversazion. Une a fevele dal so frut e che altre dal so cjan e po: 
-Satu cê?
-Ce?
Po i mostre che lis mans dal frut a son sgrifignadis par colpe di un omp che a lu à fat colâ.
- Cemût?
- Cun tune starnudade!
- Cun tune...Eh ma...
Ma vuê a jà propite il dí dal gjaul, cence nissune reson, l'alarm di une machine ferme dongje di lôr a si met a pivetâ, ciulâ, trombetâ...
-Miarde! Miarde ! Miardeee! Al berle jù dal barcon chel dal prin plan.  
- Joissus ! a dîs une cjalant daûr des spâlis di chê altre.
- Cê? A dîs che altre.
- Aaatcí ! Un om a i starnude cussí fuart tes vorêlis che il cjan al si met a baiâ, il pin a vaî, lis feminis a cridâ dal spachet e dal scandul e chel dal prin plan al vierç il barcon berlant fûr dute le sô miarde a ducj i soi porcos che prime al zontave cul barcon sierât.
- No isal chel omp che al à fat colâ il gno pin cule sô renzade ! A dîs le prime.
- Eh ma îse cheste une maniêre di starnudâ? A cride che altre a di chel om tant che al si fas strade par entrâ tal condomini.
- Aaatcí ! al fâs inmó plui fuart chel om lassant sbati  le puarte.
Le amie a si met a insultâlu,il cjan al si met a baiâi inmó plui fuart, il pin a vaî  come se cualchidun al volès copâlu, so mâri  a consolâlu e  jenfri dutis chestis vosariis, l'om al si volte par rispuindi cuntune mûse da tuart ma i rive tes vorêlis il berli inuman di chel dal prin plan che rivât jù pes scjalis a i cride par daûr: Miardeee! Po furiôs al và dal cjan: Miardeee! Dal pin: Miardeee! De mâri: Miardeee! De amie: Miardeee!  E da un par un, da ducj chei che in te strade a si son fermâts par viodi ce che al sucêt , po al si ferme di front de machine cule sirene : Miardeee! Le machine a tâs un moment e po a torne a ciulâ.
- Miardee! a i ripet l'om dant une pidade te ruede. Cíu ciu, a rispuint le machine fasint lâ lis lûs come i vôi di un interdet.
E jenfri il ciul de machine e il berli disperât dal om,  un puign di rabie te panse e une pidade tal cûl di chê purcite di machine, le domenie che a veve di sei calme e trancuile par
lassâ durmî chel puar om a sarà di sigûr  mancul calme dal pensât.
Le sere. Tal condomini lis lûs dai barcons si son a pene studadis che un canai al tache a frignâ. Une lûs a si impie tal secont plan. Po tal prin plan e tal tierc.Cualchidun al vôse di fâ sito. Un cjan al bae.Chei dal cuart e dal plan teren, di sigûr a son dâur a domandâsi se le gnot a sarà compagne che le gnot passade...Il frut al tâs, lis lûs si studin. Il frut al vai, lis lûs si impiin. Cualchidun al porche sot des cuviertis che nol in pues plui. 
Ma il frut al fâs i dincj.

Nessun commento: