I miei Video clips furlans

Loading...

03 gen 2011

Le ultime gote / L'ultima goccia


Al sarès il fradi dal titolâr e il fi dal fondadôr de imprêse.A nol sà nuie dai cantîrs ma parcé che al é de famee, a i an dât un puest. Il so puest al consist a lâ da un cantîr a chel altri par supervisâ i lavôrs.
A lui,i plasarès di lâ cu le Ferrari ma al scuen contentâsi de Alfaromeo sportive. Vuê, al à di lâ tar doi cantîrs. Il prin al é a pene scomençât e si trate di une vile da butâ jù prime di fâ sù un condomini.Al rive sul cantîr pivetant come par dî che al bisugne stâ atents, che al rive lui.
Sul cantîr al racomande subit a un operari di cirî di recuperâ lis piastrelis vecjis che son in te cusine che i plasarès di metilis in te sô cjase di campagne. Tant che lui al cjale, l'operari al tache ben plan ben plan cun tun scalpelin e une martieline. Le prime piastrele a si romp scuâsit subite, le seconde al rive a mieze piastrele prime che si rompi ancje chê, ae tiarce, doi porcos a vegni fûr in coro jenfri lui e l'operari. Alore a i cjape i imprescj de man par mostrâ cemût che si fâs.
- A si à da fâ ben plan. Capistu?
Toc, toc, toc...- Viotu?
Ma le prime a i romp subite. ...-A jere za fendude, al dîs.
Le seconde a si romp a mieze strade, Purcit di un...
Ae tierce al lasse colâ chel non di diu che al veve sule ponte de lenghe, al zonte un non di anemâl e un colp di martiel furiôs sule piastrele che al finis di rompi e po cun tune rabie metodiche al zonte un porco e un colp, un porco e un colp fin cuant che al rive ae ûltime piastrele. Lí al bute vie cun rabie scalpel e martiel tant che l'operari che al jere daûr a rundullâsi par tiere dal ridi al si pisse d'intor.

Tal secont cantîr, al é il dí de consegne des clâfs e a son daûr a meti la moquette. Guai a fâ erôrs. A lu dîs pivetant cul claxon di lunc de strade. Rivât li, tant che al cjacare cul client al cjale un zovin operari che al cîr di taiâ l'ûltin toc di tapêt.
Sintintsi cjalât, l'operari, di pôre, al frache cussí fuart su le rie che le man a i trime. Alore il capo a si met a cridai che al é imbranât e che nol à da vê pôre.
-Cjale mo! Al si sgrufuie, i cjape le curtisse e le rie des mans, al met le man tal mieç de rie metaliche, al ponte le curtisse insom de rie e cun tun gjest plen di estri ,sssst, al tae vie il tapêt e ...le ponte dal so poleâr.
Il dêt dal capo al si met a sanganâ e al macje dut il tapêt. Il client al tache a cridâ, lui a porcâ e l'operari a nol sà indulà metissi par no fâ viodi che al à voie di crepâ dal ridi.

Finalmentri a cjase. Le sô femine a i à puartât une butiliute cul conte gotis. Al à di meti cuarante gotis in tun vêri di âghe e po bagnâ drenti il dêt.
Al tache a contâ ben planc ben plan: uuune, d...ôs, tr...ma le tiarce le cuarte, le quinte e fint ae decime , lis gotis a i van jù cussí tacadis che nol rive a dî che tr, cua,ci,ss,t,ot , no!
Al undis al zonte un diu cun tun va sul osti e al tache a scuedi le butilie sù e jù fin cuant che nol cjate plui peraulatis da zontâ...E no 'nd é plui gotis te butiliute. Le sô femine a sclope da ridi e par fortune che al é cussi, parcé che le impazience di lui a jê a i jé simpri plasude e invezit di bagnâ il dêt tal vêri a van tal jet a bagnâ alcaltri.

Nessun commento: