I miei Video clips furlans

Loading...

09 feb 2011

La vite devant di se / La vie devant soi

Cul libri spleât sule mûse, i vôi si sierin miôr e a si rivares ancje a durmî ma il titul dal libri al faseve tirâ i vôi ae int che passave dongje e cualchidun al si impensave che Romain Gary al veve scrit il libri sot di un un pseudonim e cussì al veve vinçût il Premi Goncourt dôs voltis. Nissun nol pues partecipâ al premi Goncourt plui di une volte, ma cussì, juste par viodi ce che al vares sucedût, Gary al veve firmât il libri cun tun altri non e a nol olsave lâ a ritirâ il so premi.
Ma il Prix Goncourt a no si pues rifiutâ e alore a è vignude fûr le sô storie di un bocje, fi di une putane alzerine che al jere stât tirât sù da une putane ebree in pension. Veramentri dut un program da fâ rifleti su lis miseris dal mont e justamentri, lei il libri sot di tant sorêli al mi someave indecent e lei il libri cu lis sôs peraulis tacadis sul nâs a nol jere miôr ancje si vevi  il cernêli in te ombrene. No durmivi. Cule Vite devant di se a no si duar. O jeri juste ponet sun tune bancje. A doi pas, un pensionât, par vuadagnâ cualchi franc, al bateve lis mans par tirâ l'atenzion tignint pal ajar une cjadree poiade sul su barbuç. Ao dite ajar? O ai confondût le peraule "aiar" cun Emile Ajar, ven a stâi il pseudonim doprât da Roman Gary par firmâ chest libri e o ai confondût lis miseriis dal libri cun chês ator di me.

Nessun commento: