I miei Video clips furlans

Loading...

12 ago 2012

Eroe fino in fondo / Eroi fin insom

Il tornâ de vuere invalit, a nol à simpri dât il dirit di vê 'ne medae e lis medais vuê no dan altris onôrs che puartâlis a spas sul pet une volte ad an ae sfilade de Vitorie.Le pension a é ne miserie, cussì, un grum di veterans, o lis an butadis vie di rabie o lis an vendudis di cûr prime o dopo di vê cjatât un lavôr par sôrevivi.
In tun paîs dulà che son muarts 18 milions di civîls e plui di 8 milions di soldâts, al ûl dî che in ogni famee e à pierdût almancul un parint in vuere . Alore no si dismentee e ae sfilade anuâl par lôr al é come se tornassin de vuere ogni an. Cualchidun ur da flòrs, altris une butilie, alc da mangjâ...Ma al é vêr che no son plui che un cent di lôr inmó vifs sul milion e vot cent mil medaiâts.
Cussí,de perestroiche in ca, lis medais si cjatin fintramai sul marcjât di Berlin. Cui che lis compre a no si sa. Colezioniscj di sigûr. Forsit ancje cualchidun dai lôr nemîs che biecemai a crodin che cu lis medais di chei altris a saran plui valorôs.
Se il ricuart di ce che i veve costât nol fos stât plui fuart che le sô miserie, ancje lui al varès podût tarondâ le sô piçule pension e vendi lis sôs medais.
Siché al jere lât a vierzi le puarte di cjase e al si jere cjatât cun tune curtisse sot dal barbuç.
- O lis medais o le muart! A i veve cridât chel dal curtìs. E come che il puar vecjo nol voleve assolutamentri dâies, prime par fài pôre e daspò par dabon. al veve tacât a scurtissâlu.
Lui, al cirive di parâsi cul lis mans, cui braçs,cui pîs e cul baston. A ogni colp, al lave indaûr par che il curtìs nol jentri masse profont in te so cjar. Cussí, al jere rivât te cusine. Lì nol podeve plui lâ indaûr. Nol saveve s'al jere tal cûr o tal palmon e al varès vût di colâ cuant ch'a i jere rivât il decim colp ma tant ch'al cirive di parâsi cun tun braç, cun chel altri al jere rivàt a tirà fûr da un cassetin il plui grant curtis ch'al veve e i al veve zirât vie in te panze e chel bandît al jere colât al so puest.
Il sanc di un bandît o di un eroe al à simpri il stès ros che chel di un todesc in Russie o un merecan in Coree e prime che il so sanc al si massedi par tiare cun chel di chel âltri al veve clamât le pulizie.
Ce i impuartial a lui se il procuratôr vuê lu à mitut sot arèst par omicidi parcé che al à smisurât il colp par difindisi?
Ce interessial a lui si tal so paîs lis medais cumò lis dan di bot plui ai sassins che ai eroes? Cualchidun a i ten le man e al cjale chê lagrime ch i sponte sot dai vôi sierâts.
Al à l'amâr tal cûr ma al é content. Ancje s'al mûr.

Nessun commento: