Benvignût tal blog dal Furlanâr

Il furlanâr al é stât par un grum di timp un dai plui atîfs di dutis lis publicazions par furlan daspó di che, cualchidun mi a ficjât drenti un vincul che a Google no i lave. Jo no sai nancje dulà che al si cjatave e mi soi limitât a tirâ vie i leams di int chi no cognossevi e che par debolece ju vevi zontâts.
Il Friûl de pidade tal cûl,
O vevi simpri pensât che né dí o sares tornât in Friûl par soterâ i mei vués di cualchi bande o mostrâ i mei fís
al paîs dai mei vons ma finalmentri, o viôt che il Frûl, nol é plui il gno e no 'nd'é Cjargne verduline che mi tiri,
ni mâr avonde celestin che mi giri il cjâf avonde par fâmi tornâ. O jeri lât vie par no lâ sot de naie ma ogni
volte chi tornavi mi rindevi cont che il Friûl chi vevi tal cjâf al jere daûr a disfâsi e plui al si dismuelave lui e plui mi indurivi jo.
Daspó di vêlu tant pensât , insumiât, disegnât, piturât, scrit e cjantât, mi soi indacuart che chest
a nol siervive a nuie. I furlans no an il spirt dai ebreos par tignîsi dongje ma une malatie endemiche fate
di gjelosie e invidie che al prodûs il refûs à duçju chei che volaressin jevâ il cjâf cu le voie di fâ alcaltri.
A chest pont, no soi jo chi ai lassât il Friûl ma al é lui che al mi à lassât. Cun tune pidade tal cûl.
Sicheduncje, Pal moment o fâs sù cjase! Achi sot 'te webcam al o podês viodi dal vîf ce chi viôt jo pal gno barcon. Di sigûr o viodarês un cîl simpri seren e par chest il blog al é trascurât parce chi soi simpri di fûr ma si tu sês achi pe prime volte tu cjataràas da lei, da scoltâ e da viodi avonde ienfri i scrits,lis cjançons o le mê art. Mandi, ti lassi lâ indenant !Ven a stâi INDAÛR tal timp di chest blog) e scuvierzi di dulà chi ven in Friûl fin dulà chi soi lât a finí.

Le Furlane

PS: Fait un clic sul titul La Furlane par fâ tasê le musiche di font.

Forsit no lu savès ma le Furlane a é stade une des danzis plui populârs de Europe che par plui di 200 agns si cognosseve dapardut, des placis dai paisuts fin tes corts reâls e chest, ben plui che il rock&roll, il twist, il rap, swing e altris americanadis che si e nò e an durât dome une gjenerazion.

Partide dal Friûl tal 1500 e rivade a Vignêsie a é subite deventade le danze le plui populâr de vile. Daspò di aí (No dome cun Casanova) a é lade a finî dapardut, cussìche ancje cualchi compositôr forest si é mitût a componi Furlanis come Sebastian Bach,  Maurice Ravel, Gerald Finzi, Ernest Chaussons, François Couperin e come achi sot in tun sito rùs che nus mostre cemût balâle 500 agns daspò.

Naturalmentri achi, si é dât un stîl signorîl ma imagjinait un tininin i bai populârs tai paîs furlans e cjargniei cu le int vistide come chei che bielzà da un pièç a son doprâts par fâ lis fotos ator di une fontane o un vecjo palaç par fâ ricuardâ lis nestris radîs.

L'Ultin caco

Al mi e sclopât te bocje al prin muardon e tant che cu lis mans o cirivi di no pierdi le polpe che cirive di colâ come le marmelade da un panin masse cjariât, o vevi 'ne bocje da ridi pensant a...

No jé colpe mê se cheste pome mi fâs simpri pensâ ae voie di muardi ch'a i ven a un om cuant che al leche ingort il plasê di une femine ma a é colpe di me agne Lene che mi à dât le drete:

• Mangje chei madûrs tant che son pronts e lasse chei dûrs de bande. Po metiju tal congjelatôr che i cacos par madurîsi e an bisugne di frêt...

E cussì a son tre mês chi tiri fûr un caco par setemane. Lu tiri fûr le sere par ch'al vedi timp di smolâsi vie pe gnot. Al mi displâs di rivâ ae fin dai cacos ma vè le stagjon des freulis che rive vé! 

Va ben, us contarai des alegoriis di Jeronimus Bosch sul piturâ lis freulis une altre volte:-)

Cjantebevi

Lis cjantadis fatis in ostarie o in tun curtîl jenfri amîs e son simpri stadis pai furlan, e ancje di plui pai cjargniei ce ch'al jere di miôr par socializâ. Po a é rivade le radio, le tv e finalmentri internet al scomençât a tignî i furlans distacâts e a fâ ognidun par sè. A sarès ore di gambiâ.

L'insumiot

Nassût a Udin e tirât sù a Prât in te val Pesarine, o varès podût deventâ pastôr o stradin, manovâl o al massim marangon. Invezit o ai vût fortune. A vot agns, par vie che me mari no saveve cemût sbarcjâ il lunari o soi finît a Udin in tun colegjo di muiniis. Di li a Cividât e po a San Domeni fin ae etât di 19 agns. Li o varès di vê scuegnût lâ sot de nae ma ancjemo' ne volte o ai vût fortune e gracie di un barbe o soi lât a finî des bandis di Charleroi, in Belgjo.Ma erie veramentri une fortune di colâ tar un dai plui bruts puescj d'Europe? No, justamentri. Alore no sarès restât li plui di chel tant e dome cun tun diplome di marangon te sachete. Li o ai invezit fat mil mistîrs par lassâ gno fradi continuâ i soi studis fin cuant chi ai podût tornâ a scuele ancje jo. Dai 20 ai 35 o ai studiât dutis lis disciplinis artistichis che mi fasevin gole continuant a lavorâ par vivi. Daspo'  par vivi miôr o ai scomençât a fâ ce che fin da piçul nissun mi veve volût lassâ fâ.Ma soredut a doprâ i imprescj chi vevi, lis mês mans e le mê gole di creâ  mi a menât plui in sù che i miei condiscepui. Scomençant a piturâ, o ai finît par vê cuâdris tes colezions di cualchi comun ator di Charleroi e Bruxelles, prime di metimi a fâ sculture e finî par fâmi strade tal mont de mode e de architeture di internos par vie dai manichins chi ai fat par Jean-Paul Gaultier, Rochas, Dior, Nina Ricci,Van Beirendonck e un frac di âltris.Il timp, cuant che si é ocupâts, al passe cussi  svelt che nancje a no si inacuarzisi de fortune che si à vût;ma ce îse le fortune? Di spès a é chê ch'a ven par reazion ae sfortune e che a ti fâs rabiâ. Cussi se il sucès al ven, al somee normâl parcé che si lu merete.O disarès ancje che le fortune a dipent dal puest indulà che a si si cjate.Se si sta in tune rotonde a si pues vê le fortune di incuintrâ ducje chei che passin li ator.E duncje le mê fortune vere a é le miserie di mê mari che mi à fat lâ fûr finalmentri dal Friûl par lâ a fissâmi in tune rotonde internazionâl che sarès le citât di Bruxelles. Ma di chest o mi soi rindût cont dome plui tart.Passin i particolârs par rivâ a chest post.ch'al é fat juste par vie di chest toc, chi sês daûr a scoltâ e che al rimet dut in cuistion parcé che, finalmentri, di ce soio il plui fiêr?
Di jessi rivât ancje a componi musiche e no dome a sunâ chê di chei altris.Par un pôc di timp o mi fasevi fâ lis peraulis des cjançons da chei altris e ancje i arangjaments ma o no jeri mai sodisfat. Di une bande o jeri obleât di lassâ libertât di interpretazion e di une altre o pestavi di rabie parce che mi trasformavin completamentri le idee personâl chi vevi. Chest lu podevi lassâ fâ in sculture ai miei assistents ma no pe musiche. Siché o ai cjapât dut in man e vuê o puès mostrâ dut ce che mi passe tal cjâf cence vê bisugne di nissun. Forsit une di' mi disarai ch'al jere miôr scrivi in francês o talian o in inglês o spagnûl invezit di scivi par furlan ma par me il plasê al reste simpri chel.
E po, o ai il vantaç di no vê bisugne di fâ bêçs cule musiche e alore o pues sei plui libar.Lu fâs in furlan come s'o vès di riscatâ le mê zoventût pierdude a imparâ materiis che no mi interessavin, a amâ int che a si freave completamentri des mês aspirazions o ancjemo' a cjapâ le rivincite su ducj chei che volevin a ducj i coscj fâmi stâ cujet in tun cjanton prestabilît magari a cjantâ dome gjespui e messis.

In chest blog, che da plui di un an o ai scuegnût lassâ cun disden par vie che cualchidun mi lu à sabotât, o ai voie di continuâ a zontâ alc di tant in tant.
Alc di bon, a si cjatave bielzà chi e là. Se o a ai fat cualchi pecjât parcé chi no vevi capît, no mi scûsi, ce ch'al é fat al é fat. O mi scûsi dome di no scusâmi ma si soi ce chi soi al é ancje parcé chi ai savût tignî dûr cence fâ masse concessions.
O speri dome di no fâ plui i stès erôrs e par chest o scrivarai di mancul.

Dut chest, juste par dî chi ai tacât a meti sù lis mês composizions ancje sù Soundclouds e cheste achi a é une des ûltimis che inmo' no vês sintût. A é un tic le mê storie di insumiot chi cjanti ae lisere ancje se il sogjet mi sta tal cûr.Sule finâl de cjançon, o vuei dî che si sta miôr sule tiere che sot e daspo', cun dut ce ch'al sucêt pal moment tal mont indulà che ancje i plui grancj paîs a van in faliment, cui nus disial che une di' le inflazion no rivi ancje lassù e ducj chei che son lâts in paradîs a no sedin parâts jù tal infier par fâ puest ai gnûs sants di une altre religjon?
Ma in ce an rivaiso achi? Al sarès pecjât di sei stâts cussi tipicamentri furlans da ignorâ ogni artist tant ch'al jere in vite par scuvierzilu dome cincuante o cent agns dopo:-) Ma o vês le scuse di dî, che no ai fat nuie par deventâ popolâr, anzit, mi soi praticamentri platât. 

Cjançons d'amôr furlanis

Lis cjançons d'amôr furlanis a son raris. Come se i furlans a vessin pôre di mostrâ i lôrs sentiments. Fasin alore une biele ecezion cun tune balade sentimentâl e romantiche zuiade da doi vêrs morôs il di dal fidanzament. Se po o vês chê di fâ compagn...